ரியல் எஸ்டேட் பக்கம் வண்டியை திருப்பு.. மழையாக கொட்டும் பணம்!

ரியல் எஸ்டேட் பக்கம் வண்டியை திருப்பு.. மழையாக கொட்டும் பணம்!

ரியல் எஸ்டேட் துறையில் குவியும் முதலீடுகள் கணிசமாக உயர்ந்துள்ளன.

கொரோனா நெருக்கடி காலகட்டத்தில் இந்திய ரியல் எஸ்டேட் துறை கடுமையாக சரிந்தது. பின்னர் நீண்ட இடைவெளிக்குப் பின் அண்மைக்காலமாக ரியல் எஸ்டேட் துறை மீண்டும் புத்துயிர் பெறுவதற்கு முயற்சித்து வருகிறது.

இந்நிலையில், ரியல் எஸ்டேட் துறையில் குவியும் முதலீடுகள் கணிசமாக உயர்ந்துள்ளதாக தகவல் வெளியாகியுள்ளது. 2022ஆம் ஆண்டின் முதல் காலாண்டில் இந்திய ரியல் எஸ்டேட் துறையில் 1.1 பில்லியன் டாலர் அளவுக்கு முதலீடுகள் குவிந்துள்ளன.

இவை அனைத்தும் நிறுவனங்களால் மேற்கொள்ளப்பட்ட முதலீடுகள் ஆகும். ரியல் எஸ்டேட் துறையிலும் அலுவலக இடங்கள், அலுவலக கட்டிடங்களில் அதிக முதலீடுகள் குவிந்து வருவதாக Colliers நிறுவனம் நடத்திய ஆய்வில் வெளியான தகவல் மூலம் தெரிகிறது.

இந்த முதலீடுகள் பெரும்பாலும் வெளிநாடுகளில் இருந்து குவிந்த முதலீடுகள் ஆகும். இதில் பெரும்பாலான 70% முதலீடு வெளிநாடுகளில் இருந்தும், 30% முதலீடு இந்தியாவில் இருந்தும் வந்துள்ளன. இது ரியல் எஸ்டேட் துறை மீது முதலீட்டாளர்களின் நம்பிக்கை அதிகரித்துள்ளதையே காட்டுகிறது.

ரியல் எஸ்டேட்டில் எந்தெந்த பிரிவுகளில் அதிகம் முதலீடு செய்கின்றனர்? அலுவலக இடங்கள், சில்லறை விற்பனை இடங்கள், தொழில்துறை, லாஜிஸ்டிக்ஸ் ஆகிய பிரிவுகளில் மட்டும் 93% முதலீடுகள் குவிந்துள்ளன. வீடுகளில் வெறும் 15 மில்லியன் டாலர் மட்டுமே, அதாவது 1% மட்டுமே முதலீடு செய்யப்பட்டுள்ளது.

சென்னையை பொறுத்தவரை டேட்டா சென்டர்களில் கவனம் திரும்பியுள்ளது. தமிழக அரசும் சென்னையை டேட்டா மையமாக வளர்த்தெடுக்க திட்டமிட்டுள்ளது.